踏入七月，唔少球隊羅致新球員嘅合約正式開始，英超球隊密密簽入新兵，準備即將舉行嘅季前練習。不過，米杜士堡收購新球員後，有唔少問題出現，都幾麻煩。
先有奧地利國腳普加迪斯喺佢所屬嘅莫斯科斯巴達最後一場上陣比賽時，踢傷對手被逐出場，由於俾佢踢傷球員證實斷腳，俄羅斯足總決定嚴懲普加迪斯，停賽二十四個星期，足足半年。英超聯賽會雖然不會理會新加盟球員喺其他聯賽嘅停賽令，但歐洲足協就好有可能會受理，如果承認停賽期，普加迪斯唔可以代表「米堡」喺歐洲足協盃上陣。
咁都未算，上兩季喺樸茨茅夫有好表現嘅前鋒耶高保，日前簽工作證時，竟然俾英勞工處拒發，理由係佢代表尼日利亞國家隊上陣次數未達標準，米杜士堡立即提出上訴，到下星期一先有結果。「米堡」上季買維杜卡返嚟傷足成季，今次未開咧已問題多多，都算冇眼光。