荷李活男星班亞弗力（BenAffleck）同女友珍妮花嘉娜（JenniferGarner）自十個月前正式拍拖以來，一直都相當低調，之前有傳聞指佢哋訂婚同珍妮花有咗BB，但係當事人點都唔肯認，直至前日佢哋嘅發言人終於證實，佢兩個不單有咗愛情結晶品，而且重已經喺星期三結成夫婦。
借用布斯度假別墅
可能由於班仔當年同珍妮花洛庇絲（JenniferLopez）嘅戀情因為太高調搞到事業下滑，最後重分手收場，今次佢同珍妮花嘉娜一齊就變得好低調，唔想俾傳媒騷擾，所以班仔一直否認佢四月時求婚成功，但係原來佢哋星期三晚已經喺加勒比海群島上嘅ParrotCay度假村秘密舉行婚禮，而喺《特務A》入面扮演珍妮花阿爸嘅男星域達加巴（VictorGarber）都有到賀。為婚禮準備鮮花嘅花店更爆料，話班仔係借用咗好友布斯韋利士（BruceWillis）喺島上嘅度假別墅作籌備婚禮嘅大本營。至於班仔兩公婆嘅BB預計會喺十一月出世。
Pink向電單車手求婚
另外，女歌手Pink最近亦同嗰個電單車越野障礙賽冠軍男友CareyHart訂婚，據知原來係Pink主動求婚，事緣當時Carey參加緊比賽，Pink突然喺賽道邊寫上求婚字句，佢男友冇理佢，之後佢再寫話佢係認真，佢男友先離開賽道兼答應同Pink結婚。