又到7.1大遊行呢個大日子，兩位民主黨重量級人馬，前主席馬丁同黨鞭華叔，又點會唔參加，同市民一齊爭取普選呢？
冒住酷熱天氣走足全程嘅華叔，去到政府總部就要坐低唞唞氣，喺佢休息時重有好多市民搵佢簽名同合照。華叔話自己上星期病咗，所以都唔敢游水，費事傳染人，好彩睇完醫生後都好番晒。
近期睇咗中央政策組全職顧問練乙錚連載嘅文章後，華叔話好有感觸，稍後會寫番啲嘢嚟回應，唔知佢會唔會學練乙錚咁爆料呢？
至於馬丁，噚日就冇跟民主黨大隊，同鄭家富行喺前面。馬丁對遊行人數好緊張，頻頻問八方有幾多人參加，八方當時唔知實數，但馬丁就好有信心一定有幾萬人，嗰時佢都未知民陣只係話得二萬一千人。
爆料熱線：29290000、27860099
報料傳真：26239278
報料電郵：[email protected]