睇完套戲想養拉布拉多？玩完隻Game又想換柴犬？養寵物，如果只為滿足自己，並唔代表你有愛心。香港愛護動物協會（SPCA）最近就舉行咗一個名為「10大好人好事」嘅選舉，選出嘅10個個案，主角都係真正愛心爆棚。今日率先曝光是一對收養有殘缺狗仔的黃氏夫婦，同埋見到SPCA的狗仔遲遲無人領養而挺身做主人嘅Joey。佢哋養寵物唔只滿足自己，更冇話非名種不養，為自己帶來歡樂之餘，亦為寵物嘅一生帶來幸褔！
記者：馬慶武
攝影：林栢鈞、梁細權
爭寵激鬥逐格睇
牠曾經俾人掟落街
Jimmy，10個月大，上年10月被前主人由一樓拋落街，頭部着地陷入昏迷，黃生黃太當時已經留意到呢單新聞。經過SPCA搶救及休養半年後，Jimmy已經回復健康，但因為腦部受創，行路總有少少問題，所以一直冇人收養。黃生睇到報道，明知呢隻狗有殘缺，其後身體亦可能出現問題，但都決定當Jimmy的第二任主人。「我同太太都好鍾意狗，本身自己已經養咗一隻唐狗Q仔，不過見到Jimmy好慘，又驚再冇人領養佢就會被人道毀滅，所以決定領養。」黃生重話Jimmy行路係有少少古怪，有時行行吓更會跌低，但佢就唔覺得Jimmy有智力上嘅問題，反而重好醒目、好精神㖭！
牠被縛在我家門口
黃生黃太除咗Jimmy外，重有一隻叫「妹妹」嘅唐狗女，「有一次接受寵物雜誌訪問，幾日後有人將妹妹縛喺我哋屋企門口，唔知係咪有人唔想要，又知我鍾意狗，所以想我哋幫佢照顧啦！」黃生話當晚見到妹妹，見佢好攰咁伏喺地，就畀嘢佢食同畀水佢飲，之後妹妹就跟住佢哋入屋喇。就咁樣，一屋三狗兩夫婦，就過住幸福快樂嘅生活喇！
為牠找個好朋友
Joey屋企已經有7隻貓，自從搬到有小花園嘅現址，就希望達成養狗呢個心願。Joey鍾意金毛尋回犬，諗住上網睇吓有冇被遺棄的金毛等人領養，點知發現唐狗KiKi喺SPCA擺咗成年都未有新主人收養。「睇吓睇吓，覺得佢幾得意，重有啲似金毛㖭，同埋狗仔咁耐都冇主人好慘㗎嘛！」
唔介意KiKi冇人吼、亦唔介意KiKi年紀大（兩歲幾）、連主人最大權利－幫寵物改名都放棄埋，Joey重話怕KiKi一隻狗悶，專登要求SPCA幫佢玩配對，搵隻同KiKi夾得嚟嘅狗仔同佢齊齊成為Joey家成員。最後，怕醜細膽嘅Cola，就成為咗霸道兼惡死嘅KiKi「好朋友」喇！
同場加映：驚惡犬的貓
Joey養貓在先，暫時唔敢畀一眾貓仔同Cola、KiKi相處。呢間貓房裏面的貓全部都係Joey朋友唔要畀佢養嘅。
今明兩日親身見好人
SPCA「10大好人好事」選舉，由今日開始，每星期都會公布兩個個案。而今明兩天就會分別為黃氏夫婦同Joey舉行主人交流會，聽完好人講好事重有寵物比賽，鍾意寵物嘅朋友快啲嚟捧場！
地點：葵芳新都會廣場中庭
時間：3:00pm-5:00pm
查詢：28020501