中環蘇豪區，人所共知西式餐廳與酒吧林立，好難想像有間「緻好茶館」出現，更難想像的是居然有鬼佬熟客幫襯。鬼佬唔飲喜力飲普洱，泡茶功夫重耍家過你同我，自斟自飲Hea足一個下午等閒事，邊個話吹水一定要落吧㗎？
記者：周頌堯
攝影：陳盛臣
模特兒：Isa、BoBo
鬼佬Jeff教泡茶
茶館多鬼佬熟客，採訪當日出現的Jeff是其一，他不但合作拍照，還請纓教大家如何泡茶，大家又聽吓佢點講。
老闆寓工作於娛樂
由士丹頓街拐入伊利近街，突兀出現一間「緻好茶館」，老實這間並非新店，2年前已靜靜地守在這條毫不起眼的小巷，唯一不同的是現在除可茗茶外，店子還提供新會家鄉菜。老闆梁先生，自少與茶葉有不解之緣：「外祖父二次大戰後喺上海街開茶莊，我細細個已經對茶葉有深厚認識。」喝茶20多年，寓工作於娛樂，開店一為滿足自己興趣，二為讓更多人了解漸被遺忘的飲茶文化，三希望提供多一個好Hea地方給人吹水閒聊：「我想話畀人知，除咗酒吧同Coffeeshop，茶館都係一個可以舒舒服服坐低傾偈嘅好地方。」
食物味精無添加
驟看，店子大路茶館格局，四壁掛上茶詩、寶塔詩等掛畫，靠落地玻璃有一套中式枱櫈，再進是排列整齊的方形餐枱，每張餐枱特別安裝一個燒水爐，以便保持玻璃壼內熱開水的溫度，梁先生解釋：「香港人比較心急，煲定滾水唔使人等。」下午茶時段基本消費每位$38，可選白毫銀針、福鼎龍珠、玫瑰花茶與壽眉4種茶葉，點一壼茶就可以無限Hea，梁先生絕不會白眼，亦歡迎與人分享喝茶心得。喝完茶想吃點甚麼的，這裏也有食物供應，各類菜式由梁氏夫婦親手下廚，堅持不用味精，味道百分百天然，梁太道：「畀少少貼士大家，OL唔使怕食煎魚餅，之後飲番杯普洱，即刻消滯。」
家鄉新會菜
家鄉煎魚餅$52
正宗新會煎魚餅多數用新鮮鯇魚肉做，只加少許芫荽、洋葱，梁生道：「我哋好少加冬菇、蝦米、馬蹄之類嘅配料，淨鯇魚肉先食到鮮味。」
蝦粉絲$110
用大量蝦頭熬湯底，然後把粉絲放湯浸熟，撈起粉絲後再放炒熟的新鮮老虎蝦，梁先生：「呢碟都係新會家傳菜，味道濃而不濁，好開胃㗎。」
芫荽魚片粉葛羹$22
粉葛能消暑，此羹是新會家鄉消暑菜之一，粉葛切粒熬湯，放新鮮魚片令湯底變甜，最後放芫荽慢火熬5分鐘，香味四溢絕非茶餐廳味精例湯可比。
其他推介
水雲雲吞米線$52
一道簡單不過的菜，看得出老闆的一份誠意，隻隻雲吞內的餡料都有一定比例，梁先生：「我試過好多次㗎喇，用3成日本沖繩水雲海草、3成白菜、4成豬肉，味道先至最夾。」此雲吞極受歡迎，連City'super、Sogo都爭相入貨，奉上的茉莉花茶凍，就當餐後小吃吧。
上湯浸蜆$48
雞骨、豬骨、大地魚、蝦乾加胡椒粒熬上湯，蜆隻保證粒粒無沙，梁先生：「蜆先浸水，然後放入筲箕出盡力搖，搖到咁上下，如果聽到邊隻蜆發出『嗦嗦』聲，咁就證明嗰隻蜆重有沙喇。」
沙嗲牛肉$78
一直以來沙嗲被認為是南亞菜，梁先生：「其實好多潮州菜都用沙嗲，個人認為辣度反而是次要，難度在於火候，煮老咗就唔好食。」小記試過一口，牛肉不老身，軟而不韌。
緻好茶館（31040890）
地址：中環蘇豪伊利近街17號地舖
座位：30個
營業時間﹕星期一至六12:00nn至11:00pm，星期日12:00nn至5:00pm。