○六?○七年中籤馬主名單公布，馬主Ｎ啲老友馬主今年行運，十幾位都中籤，與舊年啲谷氣樣完全唔同，當然歡天喜地。賽馬投注額雖然繼續下跌，已經連跌八年，經濟好番都無補於事。但係馬會會員申請抽籤，今年就創下七年新高，八百八十份申請PPG（自購新馬），一百九十份中，中籤機率係21%；一百三十八份申請PP（自購馬），六十份中籤，機率係43%。
馬主Ｎ向馬主Ｈ報喜之後，馬主Ｈ立即上馬會網翻查，即刻好高興，因為佢識得嘅老友都唔少中籤喎。黃偉慶老爺所屬嘅「新亞校友團體」、東亞銀行班老友嘅「必勝佳團體」（成員周啟和嘅「凱旋煌」，與吳世振嘅「百威力」啱啱爆冷贏馬）、吳嵩嘅「馬聖之友團體」、時富主席關伯豪、廖創興銀行廖俊城，「步步金」馬主香國俊、前滙豐高層劉智傑、證券界女強人衞淑莊等等都榜上有名，開心晒。
皇仁書院出咗個政務司長，旺氣逼人，除咗許仕仁與同班同學周偉淦（「心願」馬主）中籤之外，居然有兩個皇仁校友團體中籤，就係「皇仁飛駒團體」與「皇仁舊生賽馬團體」；反為出咗曾特首嘅香港華仁之港華校友團體只係名列後備第三十七，應該冇希望咯。不過皇仁校友團體養啲馬，水水哋，兩隻現役馬「福友」與「皇仁精神」，都係低班失準馬，與皇仁威猛考狀元嘅形象唔多配合。既然許仕仁回朝做政務司司長，而且係唔會做清潔大隊長嗰隻，會有實權，許司長不妨幫吓啲校友手，買兩隻標青新馬，揚威沙田、跑馬地都好吖。
現在買靚馬唔會平，澳洲紙、紐紙最近雖然跌番，但較諸兩三年前，已經升咗唔少，英鎊亦然，中籤馬主想話用四五十萬港元買隻在第三、四班贏得嘅馬，難度比以前高好多，想話有隻「精英大師」、「牛精福星」？要行正大運，家山風水好，先至有機會！