張栢芝呢個月會拍住古巨基開戲，九月又會接中國星另一套戲，日前佢就趁住空檔同佢媽咪、家姐、阿姨重有助手一行五個女人去咗東京玩。今次去日本，主要係因為栢芝同家姐自從農曆年就冇見過面，而栢芝家姐好想去日本迪士尼樂園，所以佢哋行程第一日就去咗迪士尼，栢芝重捉住園內嘅獅子公仔合照㖭！
做普通人享自由
栢芝一行人又喺日本坐JR，重好開心咁攬頭攬頸影相，栢芝話平時喺香港，俾狗仔隊跟出跟入，去到外地就可以盡享天倫樂同埋做番個普通人，覺得自己好自由咁話。
栢芝重話好鍾意日本嘅地道拉麵同洋葱圈，所以佢都去到邊食到邊，又話喺香港就做唔到呢啲嘢，如果去大牌檔嘅話，肯定會搞到嗰度亂晒籠。佢又話今次行程主要係去玩，所以唔係買咗好多嘢，佢哋喺日本玩咗三、四日，至於會唔會繼續去第二度玩，栢芝就話等佢媽咪同埋家姐做決定喎。
