中方官式宣布肥龍上場！肥龍即時召見記者，大讚公務員好嘢，猛話要「團結」，又強調自己識咗當奴成三十三年！
點解要咁畫龍點睛呢？因為日後肥龍拜相，處境同當奴一樣咁凶險。各方反曾亂港勢力，咬當奴唔入，可以向肥龍埋手，正所謂「射人先射馬，擒賊先擒龍」，好似當年想郁趙紫陽，就用「反精神污染」搞掂胡耀邦先，並炮製「胡趙不和」嘅謠言，等你內部鬼打鬼！
打預防針免功高震主
當奴強勢，肥龍亦唔係弱者！中國式政治，想做低一兩個人，最易入手嘅就係散布流言，挑撥離間，話有人「功高震主」！肥龍強調識當奴三十三年，又放足料，話兩人嘅先翁，都係中華民國時代嘅警政人員，唔知係咪想打定預防針？
第二就係講到明：只做兩年，一定唔撈，對特首寶座並無興趣，咁亦杜絕埋將來有人話佢「擁兵作反、挾天子以令諸侯」嘅小報告！肥龍上場，民主派先施下馬威，話佢做過顧問，叫佢講清楚同地產商嘅關係先！好呀，咁民主黨嘅盧子健，開公司同政府做公關顧問，民主黨同政府之間有冇私相授受，呢一樣又使唔使交代吓？
另外親中民建聯出名多閒錢，請街坊食魚翅、一團團咁大巴車上深圳玩樂，眾所周知係祖國政府磅水養命，咁民建聯又應唔應該申報吓同北京方面有乜錢財轇轕，有冇利益衝突？
重有，自由黨方面，呢幾年又代表咗咩嘢商家，收受過幾多有錢佬打本津貼，係咪都應該公開吓盤數，睇吓二○○七年，若然該黨提名任何人參選，又會唔會暗中由某大財團搭緊條水喉入嚟泵水換着數？
取消起歌劇院示公允
邊個生來乾淨？邊個死後清高？肥龍插手西九，會唔會偏幫財團？睇怕佢為示公允，首先係取消起歌劇院，以免俾人話益自己一個睇意大利歌劇、慳番啲頭等機票食宿，然後宣布起番座西九新光戲院，將快將拆卸嘅北角愛國神功戲棚搬來西九，等啲愛國同胞維園阿伯，一路睇大戲，一路照樣吐吓痰吖係咪？
爆料熱線：29290000、27860099
報料傳真：26239278
報料電郵：[email protected]