許仕仁離開咗政府五年，噚日以老拍檔嘅身份重返政府，經過呢幾年嘅風風雨雨，香港政府同從前已經好唔同，好似以前做高官，大家都冇乜興趣起你底，但係今時今日行問責制，就要和盤托出，好彩老許太太羅美美未退休前係公務員，大家興趣不大。
八方聽聞，許太為人低調，每次出出入入，都企喺後面，唔想俾人影到佢個樣，上個星期為煲呔慶功就避無可避，出晒鏡啫。
老許𠵱家返去政府做大官，好多職位都要退落嚟，馬會噚日就宣布咗佢老哥辭馬會董事職，即時生效，主席夏佳理重祝佢「事事如意，馬到功成」。
另外，煲呔今次點將雖然冇林煥光份，但係做太平紳士就有，民主派都有周奕希同盧子健獲委做JP。郭炳聯、施永青、唐慶年、殷巧兒以及余若海亦榜上有名。
爆料熱線：29290000、27860099
報料傳真：26239278
報料電郵：[email protected]