昨日3隻新股晨訊科技（2000）、中遠控股（1919）同埋海灣控股（416）齊齊掛牌，但3隻新股又齊齊潛水，跌幅介乎10％至16％，場面異常悲壯，跟住重有唔少新股排住隊上市，小初真係要祝佢哋好運。
另外，經紀陳日前提過傳聞有美資大隻佬入股浪潮國際（8141），隻股前日急升後於昨日停牌。經紀陳話，根據大陸來料，浪潮即將引入一間美資大型軟件集團做股東，但究竟係直接入股抑或認購CB就尚未清楚。
經紀陳又話，雖然美國軟件集團名聲夠響，但浪潮股價在個零月內，由唔夠0.40元升到1元樓上，擔心好消息已反映晒在股價上面。加上美資做事嚴謹，在傾緊入股之時，股價炒到識飛，重要一街都係春江鴨，真係唔知人哋會點諗。
另外，雖然賭股熱潮已過，但昨日停牌的中華國際（1064），傳聞即將公布收購濠江賭船，兼且會進行集資。經紀陳話，有傳聞隻股因為發行股數多，可能會併完股先至供股。
慕容小初