大摩出報告，叫減持滙控（005），滙控上晝收市仍造126-126.50元，下晝少少走樣，低見124.50元，收125元，跌1.50元。恒指全日跌76點，有54點係拜滙控回落所賜。
7月期指跌幅132點，大過恒指56點。前日高水63點，昨日縮減到7點。傳統智慧或街頭智慧係高水代表市好，但好多時事實則係掉轉頭。前日高水唔少，昨日個市就跌畀你睇。
和黃P輪：和黃（013）收報70.25元，微跌1格，和黃P輪3745暴升167%，收4.8仙，交投當然係細眉細眼，唔夠兩球易手，金額6萬。隻輪7月11日到期，下周二最後交易，行使價70元，正股高過70元嘅話（昨收70.25元），隻輪變廢紙。
賭和黃P輪，正路對象係4944，隻輪12月尾夠鐘，輪價22.5仙，溢價6.4%，槓桿率31.2倍（有效10.8倍），引伸波幅18.2%。
和黃個勢暫時偏淡，但中線偏好，如果賭輪，等和黃進一步回軟時低位買C輪風險會細啲。
中移動P輪：中移動（941）收報28.95元，下跌0.40元，中移動P輪4709收4.2仙，升27%，有18球易手。隻輪10月尾到期，溢價10.9%，槓桿率68.9倍（有效13.3倍），引伸波幅19.1%。4709風險好大，正股牛皮嘅話，隻輪會跌得好傷。睇淡中移動，P輪4938係正路之選。
隻輪11月尾到期，輪價11仙，溢價6.5%，槓桿率26.3倍（有效9.9倍），引伸波幅21.6%，隻輪數據合理，比較博得過。
章盛