發展商聯同地產代理搞誓師，幾乎睇到厭咁滯，估唔到輪到投資者嚟接力，資深投資者黎汝遠夥拍美聯物業，噚日搞咗個「極速出貨寶馬名車爭奪戰」誓師會，打正名號散貨。 由即日起至十二月底，四大代理行中，邊個經紀最快幫佢賣出物業，淨賺價達到五百萬，就可以贏到一部價值三十二萬九千嘅寶馬汽車。所謂淨賺價，係成交價減買入價、釐印費、買入同賣出嘅佣金。