Beyond的靈魂人物黃家駒於九三年逝世，昨日是其死忌，黃家強、葉世榮和家駒姊姊昨日冒雨到省善真堂和將軍澳華人永遠墳場拜祭。面對Beyond解散，世榮表示昨日曾對家駒說，Beyond的內地演唱會十分成功，實現了家駒的夢想。
昨日是Beyond成員黃家駒的死忌，雖然下着傾盆大雨，但Beyond的葉世榮、黃家強、家駒的大家姐以及數十名歌迷，依然風雨不改相約拜祭家駒，由於黃貫中身在北京出席音樂會，故未能返港致祭。
買紙紮波鞋致祭
眾人於下午四時在省善真堂集合，其中家強和世榮分別跟自己的樂隊成員和新簽約的歌手一起到場，眾人除了在家駒的靈前上香外，亦買了祭品包括波鞋、相機、收音機、服裝和香煙等，他們均希望奉上最新的用品給家駒，隨後他們便往將軍澳華人永遠墳場拜祭。
世榮上香時低頭細語，事後他表示向家駒說了Beyond雖然解散，但相信各成員會創佳績，世榮說：「我頭先話畀家駒知，我哋嘅內地演唱會搞得好成功，達成咗佢嘅夢，每個地方嘅歌迷都好熱情，睇到好感動。我重話我哋雖然做自己嘅音樂，但都會好努力，到時每個人都會成功。」
解散命運改不了
到於內地歌迷打算籌集一億個歌迷簽名，務求Beyond三子打消解散念頭，世榮說：「我知道，但係改變唔到嘅，大家唔需要擔心，分開咗依然會做音樂，我哋會成功所以請安心，唔使諗咁多。」
家強則說：「其實一定會有唔捨得嘅感覺，尤其係見到香港嘅歌迷，佢哋咁支持我哋，但呢件事已經改變唔到喇。」
採訪、攝影：王連連
