朗拿度前晚睇到巴西冇咗佢都可以攞到洲際盃，肯定笑唔落；但好彩同日都有一單好嘢發生，就係佢宣布投資玩賽車，進軍賽車世界盃。
球星做車隊老細唔係乜嘢新鮮嘅事，好似朗拿度嘅皇家馬德里隊友費高同卡路士都有投資玩車，所以朗拿度亦嚟湊湊熱鬧；而佢投資嗰支巴西車隊，嚟緊喺今年九月至明年三月會參加一個叫A1嘅賽車世界盃，同其他國家嘅代表鬥一番。
朗拿度話賺錢重係其次，最重要就係令巴西喺賽車上好似足球咁威，成為世界冠軍。佢咁話：「我好鍾意賽車。我哋國家係個傳統嘅體育強國，我都係出一分力啫。」
雖則朗拿度得嗰二十八歲，重未使諗退休住，但頂多踢多三、五、七年，係時候開始發展另一個事業。巴西人除咗踢波叻，揸車都有一手，近年就出過兩個世界冠軍畢奇同冼拿（已故）；朗拿度佢揸車叻唔叻我求大俠就唔知，但佢勝在有錢，所以應該有得搞吓，話唔定第日做埋車壇大亨都未定。