七一去不去遊行，分成兩派，每個陣營各有不同理由。去的理由似乎比較特別，像：
公務員ａ：七一前表態不去遊行的，都是乞人憎的人，到時去到，擔保不會篤口篤鼻撞見這些人，全日都會覺得心情無比愉快。
兩子之母ｂ：兩年前的七一，在維園團團轉，高溫蒸發了不少脂肪，一天之內輕了四磅！去年一樣熱得交關，遊行半日，縮減了一餐下午茶，又輕了兩磅。今年肯定要堅持下去，期望今日破天荒能夠勁減五磅，做自己的另類瘦身代言人。
陽光美少女ｃ：我鍾意有內涵的男仔，其他男仔約我去迪士尼，naive兼冇意思，他約我去七一大遊行，幾咁波瀾壯闊，零舍有深度。
深閨壯男ｄ：冇膽單對單約她，趁七一人多勢眾，冇十萬都有八萬（警方估計的話，冇一萬都夠幾千），人聲鼎沸時乘機表白，好想由今年的七一到以後每一年的七一，年年跟她和她的北京狗在一起。
隱蔽青年ｅ：我老友舊年七一去劈友，冇命返屋企。另一個就燒炭自殺。雖然自我感覺冇曾特首咁high，但我絕對唔嫌命長，遊行喊口號係幾戇居，點都好過喊打喊殺爆樽。我用這個方式紀念兩個死黨，泉下有知，希望他們會開心。
灣仔老街坊ｆ：冇乜issue之下，明年可能搞唔成事，七一遊行，今趟就係last一次，絕版發行，後會無期。