老牌正經嘅月刊在港開業四十年，總編輯權少請食飯，席設鏞記，「金牌燒鵝」一上枱，韓公就一箸夾落，唔係要燒鵝髀，而係要鵝頭。東方保羅紐曼、作家李笑曰：「飲威水，鵝頭係最佳配搭。」韓公好飲威士忌加水，去到邊都有支私家威收埋，鏞記甘老闆更不時勸韓公飲鏞記珍藏㖭。飲完威水，下筆為文特別威水，此乃韓公慣例。韓公話：「我其實係為咗食燒鵝頭先至飲威水嘅啫！」講到咁有吸引力，食家薛唔抵得，行過隔籬枱一望，見冇人願食鵝頭，立即夾畀自己送酒，佢話唔好嘥料喎。
席間有韋八少在，冇人敢認老，韋八少面色光滑、精神奕奕，可以食完晚飯再打十二圈，然後去晨運。後輩小姐問佢如何keepfit，韋八少話：「第一就係唔好節食，第二就係食肉要食肥，食雞要連皮。」後輩話：「好唔健康啫，又多膽固醇。」韋八少話：「唔好聽咁多專家講，睇我就得！」睇佢就恨死人咯，佢老哥行年七十有幾，去申請車牌延期，被官員叫佢先去驗身，醫生話：「一睇就知你完全冇問題啦。」呢樣係唔係「食肉要食肥，食雞要連皮」之良好後果，有待考究。
作家李聽見韋八少咁講，又搵句大陸以前流行嘅順口溜贈畀在座後生一輩：「周總理只酒不煙，活到七十三；毛主席只煙不酒，活到八十三；鄧小平又煙又酒，活到九十三！」眾人大笑，呢句話最好講畀反吸煙人士聽，睇吓有乜反應。鄧小平好似老年戒煙，因為紅線女開人民代表大會之時，見鄧小平坐在主席台上食煙，特登寫咗份意見便條畀鄧小平，勸佢唔好。據前輩記憶，紅線女之便條其實去唔到老鄧手上，有關人員將便條交咗畀趙紫陽審閱，點知趙紫陽話紅線女未嘗無理，親自將字條交咗畀鄧小平。前輩話：「講唔定此乃趙紫陽下台原因之一！」