新的政務司司長許仕仁今日坐正，近排日日都有新聞見報，連陳年舊料都俾人摷埋出嚟講，例如佢七十年代曾被借調去廉署，幫手拍反貪污電視劇集，但原來有兩集遭禁播，廉署打老虎應該係好事，點解唔出得街？
據知情人士講，呢兩集電視劇，一套係關於前總警司葛柏案，一輯係關於洋警官舉報長洲庇賭事件，題材絕冇問題，但因為諗住出街前，咁啱發生警廉衝突，後來政府局部特赦，為咗唔想喺呢個敏感時刻引發嚴重後果，惟有抽起唔播。兩套電視劇至今都未出生天。
另外，聽講英國BBC曾拍過套講英籍反黑警司譚寶禮嘅片集，但因為片尾加咗一句，話套劇拍完冇耐，佢就俾廉記拉咗，結果亦難逃禁播命運。
傳真︰2623-9278
電郵︰[email protected]