內地女歌手王蓉近排推出嘅新碟喺內地銷量唔錯，唱片公司就即刻食住上，安排佢九月喺北京工人體育館舉行處女演唱會。近日王蓉來港宣傳，正好趁呢段時間準備，買定bra為處女騷「裝胸作勢」！
跣腳險仆倒
前晚八點，王蓉同助手喺銅鑼灣羅素街嘅MissSixty服裝店出現，戴住墨鏡嘅王蓉着住露腰背心仔周圍睇衫，正當佢一邊手指指一邊行落樓梯時，唔覺意兩度跣腳，差啲就做咗空中飛人，好彩佢身手敏捷，即刻企番穩。
其後王蓉行咗去Armani試太陽眼鏡，但試咗兩、三副都唔啱心水，於是又轉去附近一間女性內衣店揀戴喺入面嘅「眼鏡」，王蓉對揀bra相當細心，佢會㩒吓個bra嘅前後左右，又檢查個胸墊夠唔夠挺，重同女助手一齊研究㖭。馮仁昭知道王蓉入行三年第一次開個唱，所以佢好緊張，凡事親力親為，佢唔親自揀番個挺啲嘅bra，到時又點托得起華麗嘅歌衫呀？
