八方早前講過，傳患重病嘅自由黨立法會議員梁劉柔芬最近報平安，自由黨副主席周梁淑怡噚日中午一點更收到Sophie由三藩市打番嚟嘅長途電話，梁太話已經開咗刀，𠵱家冇事喇，叫大家放心，重話下個星期三會趕返香港開今個立法年度最後一次大會。
至於具體嘅時間就重未定，到時會話畀周梁聽。周梁收到電話，第一時間就話晒畀班黨友知，然後就同記者講。佢話，Sophie當日去美國睇醫生好突然，只係話下個星期開唔到立會，之後就冇消息，噚日都係第二次聽番佢把聲，所以好興奮。
Sophie同周梁講，佢其實因為心室中間塊膜穿咗個窿要急住去醫，而唔係患咗乜嘢癌症，𠵱家開咗刀，已經冇事喇。既然梁太冇事，大家都為佢開心，咁有病范太一定准佢告假，實在唔使急於返港。另外，周梁噚日同煲呔一齊亮相，唔知係咪人逢喜事精神爽，兩個人容光煥發。
傳真︰2623-9278
電郵︰[email protected]