期指結算日，港股先升後跌，恒指唔見10點，但市底仍然係靚嗰隻，7月期指有進帳20點，高水63點。炒輪策略，仍然係有低價買C輪，唔係見高價揸P輪。
和黃C輪3903：個市屬於太平，和黃（013）報低兩格，但隻和黃C輪3903則走晒樣，低收17.1仙，1日之間散咗接近兩成，有238球易手，跌幅打入死火榜上第9位。
3903係高爆炸力與殺傷力C輪，8月尾夠鐘，溢價3%，槓桿率41.2倍（有效21.1倍），引伸波幅14.8%。和黃近期頗多搞作，可以睇好。有冒險精神者炒和黃C輪，可以小敲3903，注碼細細聲大大，同埋轉身要快。唔想太刺激，則揀3936，呢隻10月到期，唔怕溢價縮得太快。
長實C輪3935：長實（001）賣渣甸山隔少少嘅名門，日日有新聞見報。當年呢塊地，由胡家賣畀長實，作價1億元。今日用1億元只能買得兩個半高層靚單位，當年賣祖業者真係感慨良多，最緊要睇開啲。呎價兩萬幾銀，做賣樓嗰個好過做買樓嗰個。
睇好長實，炒Call輪，可以揀3935埋手。隻輪喺10月中到期，輪價45仙，溢價2.3%，槓桿率16.8倍（有效11.7倍），引伸波幅16.5%。隻輪昨跌達10%，跌後低位有得諗，值博率不俗。
章盛