日本料理店子開到成行成市，玩Fusion、講正宗再不是賣點，屋邨仔小舖卻想到用顏色招徠，大廚更自認好色之徒，碟碟襯晒色擺到靚一靚才端上枱，當中一道三色牛扒最搶眼，普普通通的牛扒有綠、黃、粉紅三色相間，賣相討好未吃已經口水流。
記者：周頌堯
攝影：黃子偉
三色牛扒
原價$128
特價$88
原塊安格斯牛扒放入焗爐，利用高溫鎖住肉汁，3分鐘後取出蘸3隻有色沙律醬，黃色一層用切茸的鮮甜熟透芒果混蛋白沙律醬；綠色一層是日本赤城縣芥辣與沙律醬的混合體；粉紅色一層是切碎北海道明太子混沙律醬，上色後再焗3分鐘即成。
碟碟100分心機菜
屋邨仔壽司店一向予人的感覺：地方淺窄、將價就貨、食物款式選擇少，總之一句到尾好極有限，「大和御膳料理」位於小西灣富欣花園，地舖格局同樣店子細細，食物質素卻比想像中高，經理Kelly有話要說：「我哋做過考察，雖然小西灣係偏僻啲，但附近無咁多日本餐廳，容易做到街坊生意。」得街坊支持全靠誠意，每一碟端上桌的食物都是心機所在：「老實講，壽司嚟嚟去去都係嗰幾廿款，擺得靚啲、食物新鮮啲、用料配搭好啲，畀客人知道我哋無揸流攤，咁就自然有回頭客喇。」
一扒三色最搶眼
好一句「擺得靚啲」，這全拜入行超過10年的大廚峰哥所賜，曾在不同中西餐廳工作過的他自認好色之徒：「乜菜式都好，味道行先最重要，食物講求新鮮之餘都應該講究賣相，我好鍾意玩顏色㗎，簡簡單單一碟餸，我一定要砌到靚一靚先擺上枱。」確實所言非虛，一道普通的牛扒，竟有黃綠紅三色，一瞥似幅色彩斑斕的油畫：「真係好『出』色㗎，啲客離遠見到咁得意，多數都忍唔住點番客。」至於盛載食物碟子卻比較沉色，何解？「用啡、淡綠、白、淺紫嘅碟，咁先唔會搶走食物嘅色彩嘛！」有道理。
三文魚軟殼蟹卷$53
卷內的軟殼蟹要夠熱辣辣，舖面的三文魚要夠凍夠新鮮，撒面的白色千島醬、橙色蟹子，襯碟旁的綠色綠茶味與粉紅色草莓味沙律醬，靚爆！
金龍大蝦$68
今次玩粉紅色，峰哥解畫：「粉紅色嗰啲係日本魚鬆粉，貪佢顏色咁搶眼，我重專登擺到成架車咁款㖭！」靚就確實靚，似不似車老實就見仁見智，不過擺法肯花心思，心機100分。
特色燒番薯$38
日本超甜番薯先烚5分鐘，再放入爐燒5分鐘，邊燒邊髹由綠茶粉混合黑糖魚膠的醬汁，番薯條微泛暗綠，再加點點黑芝麻，靚到絕。
雜錦刺身拼盤$388
九彩咁多色，全部食材每天從九州入貨保證新鮮，總計有三文魚、油甘魚、日本海鱲、章紅魚、劍魚及八爪魚各4片，希靈魚2片及牡丹蝦2隻，少咁件問老闆喇。
魔鬼魚海鮮炒飯$78
比一般只得蟹柳、頂多加兩粒蚊型帶子的所謂海鮮炒飯有誠意得多，此飯有軟殼蟹、青口、魷魚片、鮮蝦、八爪魚、北寄貝等配料，最特別是撒上面的魔鬼魚魚子，粒粒彈牙有口感。
燒皇豚肉
原價$138
特價$98
由九州空運到港的13磅乳豬髀非常細嫩，先用秘製醬料醃一晚，入爐蒸6小時令肉身鬆化，客人點菜時再入焗爐焗20分鐘，賣相算最弱，但味道一流。
食客有Say
大和御膳料理（25055590）
地址：小西灣道9號富欣花園3號地舖
坐位：約70個
營業時間：12:00nn至3:00pm，6:00pm至12:00mn
