每年唞暑，意大利球壇都玩「球員競投遊戲」，擁有某球員一半擁有權嘅球會，傾唔掂數就要向意足總出價（銀碼唔公開）競投個球員，價高者得。前日祖雲達斯就同費倫天拿競投米高利、馬利斯卡，結果用超筍價錢投得，「老婦人」果然精打細算。
米高利馬利斯卡變人球
祖記總監莫治事後洋洋得意：「舊年我哋賣米高利、馬利斯卡嘅一半擁有權畀費倫天拿，共獲六百三十萬鎊（約九千二百萬港元），今年就用一百六十萬鎊買番返嚟，當然係賺咗。」換句話講，祖軍變相好似借兩個球員畀費倫天拿一年，帳面就淨賺四百七十萬鎊（約六千六百萬港元）。據講祖記高層係計準費倫唔肯再畀高薪酬兩個球員，半放棄而唔願出高價，所以祖記出一百六十萬鎊已夠數。
講時講，成個「遊戲」最大輸家係呢兩個球員，因為佢哋回歸祖記都未必留得長，怕且唔係成為交換籌碼，就又成為出年呢個「遊戲」嘅主角，再當「人球」也。