蔡卓妍（阿Sa）在電影《虫不知》中扮演懂得飛天的萬人迷莎莎子，其中一場戲講述她與陳柏霖對打，阿Sa指柏霖穿上「鹹蛋超人裝」後重要部位有激凸效果，還以「宏偉可觀」來取笑對方。
由梁洛施（Isabella）、陳柏霖、關智斌及Twins主演的《虫不知》，將於下月二十一日暑假檔期上映，蔡卓妍在戲中飾演懂得飛天術的萬人迷莎莎子，其中一場戲講述陳柏霖為增強自信心及贏取Isabella歡心，毅然參加由阿Sa擔任召集人的「推你大賽」，與其他少年拼個生死，阿Sa的法術令眾人大開眼界，最後她更與柏霖大鬥法。
着超人戲服辛苦
阿Sa自言她與柏霖的戲服十分惹笑，她說：「我套戲服全部都係粉紅色，頭上重有條羽毛黐住，似足東瀛貴婦，柏霖嗰套『鹹蛋超人激凸裝』重誇張，成套七彩緊身塑膠衫穿上身，好彩佢身形夠fit，點着都冇肚腩，但大家請望望肚腩對下四吋位置，完全產生咗『激凸效果』，睇到我眼都凸埋！」
提到「重要部位」被阿Sa取笑為「宏偉可觀」，柏霖說：「邊有呀，係件戲服好窄啫，又唔見佢望我起𦟌嘅手瓜，硬係特別留意我啲敏感部位，好百厭！」柏霖指穿上該戲服後感到極度焗熱，比穿古裝戴頭套更辛苦。
柏霖在其中一幕要被推落泥沙堆之中，他說：「我同對手都有吊威吔，我要攤喺沙上伸直手臂，對手就要拱橋同我對招，好多次佢手腳唔夠力，做唔到拱橋成個身壓住我，搞到我差啲窒息，而佢踢腿時又成日將沙粒踢起，搞到我食沙都食咗三四次。」
吊威吔唔敢太飽
而阿Sa亦要吊威吔從天而降，對此她說：「我莎莎子出場梗係有排場啦，我要由四樓嘅高度飛落地下，其實我最怕吊威吔，尤其今次拍呢場戲啱啱食完飯，飽住肚吊上吊落好攞命，所以我唔敢食太飽。」
