恒指噚日一度升破14339阻力，創出14365的今年新高，但未能竟全功，結果以14277收市，反跌10點，成交223億元。7月期指則收14340，高水63點。
今次升市，港股已累積升逾800點（13542到14365），而14339又係長方形徘徊區的頂部，係一個重要阻力位，未能一舉衝破，理所當然。後市向好，但相信在此水平要整固一段時間，才能破位而上。
7月中，又有多隻大藍籌C輪到期，到時大戶又要做工夫。呢兩日，遠期C輪同合理價相比又變得低水，有迹象顯示發行商又在派貨，因此，唔排除佢哋會推番低個市補倉。
重有，噚日個市嘅升勢未見擴散，好多細價股同當炒股都掉頭回落，雖然話係受銀建國際（171）急挫影響，但在一定程度上，亦顯示投資者的信心仍未恢復。銀建受不利消息影響，基金全面洗倉，股價急挫38%，成交更大增到6億多元，今次又係一次財富大轉移。銀建元氣已大傷，短期或會因大跌而出現反彈，但中線要等「冇事」才可再入市。
銀建股價一度跌穿2元大關，收2.075元，大跌1.325元。以往績計，PE已跌到7.95倍，以05年預測盈利約6億元計，PE將再調低到5.3倍。噚日之跌，主要係內地指剝離不良資產處置違規，投資者恐怕銀建會受牽連，或會有後遺症，引起連鎖性的恐慌拋售。由於外間對實況不了解，銀建理應作出澄清，有冇事，都起碼畀人知道。事實上，如果影響程度唔係咁大，銀建就真係跌得過份。
傳有大動作
渝港系近期有異動，渝港（613）由0.12元升上0.136元，渝太地產（075）則升破1.20元的大圓底頂部，升上1.29元。兩股近日出現調整，消息指渝港會有大動作，要留意。
渝港係旗艦控股公司，業務包括包裝、地產、交通、基建同財務投資，旗下的上市公司有渝太同確利達（1224），亦持有港通控股（032）權益，往績PE4.5倍。過去半年，渝港股價在0.116元至0.136元間整固，若破位而上，初步上升目標係0.16元。重有一點，就係渝港每股資產淨值0.24元，現價大幅折讓近50%！
郭兆誠