香港的大型商場競爭亦愈來愈大，繼早前掀起的《大長今》演員爭奪戰後，apm扭盡六壬通宵吸客，德福更找來梁詠琪做生招牌……每個商場有招出招，抽獎、表演、展覽林林總總排山倒海，總之最緊要引到你嚟幫襯！不過估都估唔到今次連未能上市的領匯都湊熱鬧，鮮有以屋邨商場的姿態豪掟1,800萬出嚟搞大抽獎，誓要令旗下133個商場起死回生！到底呢1,800萬真係有效吸客定係揼落鹹水海？即Check商場租客有嘢講！
記者：黃藹瑩
攝影：何家亮
Models：Yanni、Ricky（Salvador）
領匯頭獎送Benz
領匯同房委會聯手舉行的「千萬三重巨獎迎夏日」活動，由啱啱過去的星期日（6月26日）開始到10月9日舉行三個月。呢個三重大抽獎包括「即抽即獎」（逢星期六、日及公眾假期舉行）、「每月大抽獎」同「終極大抽獎」，頭獎係一部價值34萬的BenzC200，極有吸引力。所有喺指定屋邨商場消費滿$100的顧客，憑即日發票（須由兩間不同商舖發出），就可以參加即抽即獎一次。
查詢：31882538
網址：www.thelinkmanagement.com
領匯話反應熱烈
一心諗住靠呢個大抽獎嚟谷商場人流的領匯，似乎對今次活動充滿信心，大拿拿攞400萬出嚟做宣傳不特止，獎品都豐富過人。除咗三重大抽獎的頭獎Benz極之吸引外，更在旗下各商場大搞巡迴嘉年華。
據今次活動的領匯發言人稱，由上星期星期日（6月26日）活動開始到𠵱家，市民反應極之熱烈。不過小記亦在剛剛過去的星期日去過同樣有搞活動的龍翔中心，觀察兩個鐘頭後發現攞單去換抽獎券的市民唔夠廿個，到底反應有幾熱烈，你話呢？
店舖一 好少有生客入嚟！
高比屋（柴灣環翠商場一樓6號室）
開舖年期：未夠1年
有咩困難？
老闆Michael：「我呢度開咗唔夠一年，都唔算話有得賺啦！喺屋邨開舖都唔會預有得賺大錢啩？最慘咪就係我哋只可以做到熟客嘅生意囉，真係好少會有生客入嚟，商場嘅宣傳好唔夠！」
點睇1,800萬大抽獎？
「得啖笑啦！我覺得幫助唔會真係好大，你都唔會為咗抽獎特登嚟買嘢啦！我唔覺得生意好咗！不過啱啱先開始，我就唔會下定論囉，或者會帶旺到個場，希望有奇迹啦。（商場）會搞呢啲活動吸引顧客都係好事，好似之前嘅免費泊車咪好似真係多咗人流囉，不過好快又取消咗。」
店舖強撐招數：
1.折頭俾熟客
2.入貨啱後生口味
3.靠口碑
熟客仔：婷婷
「嚟呢度幫襯都係因為我住附近，而且又有朋友介紹我嚟，咁嚟得多就熟咗，熟客仔有折頭！喺度買會平過出面，不過出面商場始終會多啲產品選擇。」
店舖二 邊有邨外人為抽獎入嚟！
合利玩具（柴灣環翠商場1樓F7）
開舖年期：超過5年
有咩困難？
老闆梁生：「舖位細，冇新客幫襯囉！租金雖然唔貴，但宣傳又唔多，𠵱家同邨都有我哋呢類型嘅玩具舖，競爭大咗！呢啲嘢房屋署喺租俾其他人之前應該幫我哋諗吓！」
點睇1,800萬大抽獎？
「呢類活動搞咗等於冇搞，會有咩邨外人會為咗個抽獎嚟呀？我啲主要客仔係細路多，佢哋都冇要單啦。就算嚟又未必嚟我哋度，根本就對我哋冇幫助，人流都唔會多㗎啦！減我哋租重實際！」
店舖強撐招數：
1.新貨賣得平過出面
2.賣多啲HitItems
熟客仔：阿葛
「我返學喺呢度附近，有冇抽獎都會嚟呢度買！幫襯開咪照嚟囉，有啲Product真係比出面平啲，買得過！」
店舖三 屋邨商場形象問題
美亞公司（黃大仙龍翔中心G12號舖）
開舖年期：2年
有咩困難？
店員李小姐：「困難就唔算有，不過呢個商場靚啲，租咪貴啲。最大問題都係冇熟客囉！生客真係少之又少，如果商場可以幫到我哋就最好啦。」
點睇1,800萬大抽獎？
「商場有些少搞作都好過冇嘅！嚟我度買$100唔係咁難，不過唔知啲人會唔會為咗抽獎嚟囉！喺我哋呢度買嘢一定有單，不過我又唔覺生意好咗！我覺得始終都係屋邨商場個形象問題大啲。」
店舖強撐招數：
1.買2隻（monchichi公仔）有9折
2.夠多款
熟客仔：
不透露姓名
「住呢頭所以嚟買，呢間舖好多人都知。我又唔係成日出外面，呢度方便嘛。」
店舖四 生意唔見有起色
港信精品服務部（樂富中心一期三樓T110B舖）
開舖年期：2年以上
有咩困難？
老闆汪生：「個商場舖就多，但冇咩人行，屋邨人都唔係好多，莫講話出面啲邨外人啦。商場又唔搞咩Promotion，完全冇理我哋！」
點睇1,800萬大抽獎？
「獎品係好豐富，但邊會吸引到出面啲人專程嚟消費，不過肯搞啲嘢都好過唔搞。我諗都係邨內人自己玩返個抽獎囉。不過我哋嘅生意一樣唔見有起色，抽獎都係冇用！」
店舖強撐招數：
1.賣珍藏貨
2.店員有禮
熟客仔：Kelvin
「因為自己鍾意飛機模型所以成日嚟，加上又住呢頭。好少有只賣飛機的模型舖，唔想佢結束嘛！」
