日前阿爺下面的審計署，話要全面審查四大資產管理公司違規處理不良資產事件，其中信達資產管理個仔銀建國際（171），昨日股價即刻勁瀉近四成。經紀黃話，唔使問阿貴都知係外資芬佬沽貨啦。
經紀黃話，江湖傳聞向來捧開銀建場的大陸炒家，已出盡法寶力頂，並力證銀建本身並無涉及事件，重話如此受牽連實在好唔抵。雖然大陸炒家力頂，但與芬佬實力強弱懸殊，未必可以阻止股價繼續下跌。
銀建昨日甫開市就見到一系列歐資沽盤殺到，結果一度低見1.96元，收2.075元，大跌38.97％，成交股數2.27億股，金額6.06億元。
另外，冷門股白花油（239）近排股價堅挺，在公布今明兩年都派特別股息後，股價昨日又再大升10.38％，收2.925元，再創近年新高，兼且唔係乾升，成交股數有366萬股，金額1056萬元。
經紀黃話，白花油雖較低調，近排大升後，息率仍近10厘，自然吸引到機構投資者及好息之徒捧場。
慕容小初