改編著名漫畫嘅《神奇４俠》下月中就喺香港上映，四位主角謝茜嘉艾芭（JessicaAlba）、約雲基芬（IoanGruffudd）、基斯艾雲士（ChrisEvans）同米高戚奇里斯（MichaelChiklis）早排去悉尼宣傳，重接受咗本報專訪。
各有特異功能
喺戲入面，四位主角各有異能，約雲嘅身體可以彎曲伸長，謝茜嘉識隱形，基斯全身會着火，米高就力大無窮。約雲話拍攝時遇到唔少困難：「着住神奇制服好熱，但流汗後又覺得好凍，感覺唔多舒服。而且好多戲係分開拍或者要配上電腦效果，所以拍嗰陣我要憑空想像，幻想點樣伸長對手先至夠真實。」佢又話《超人特工隊》嘅角色都係從《神奇４俠》中攞靈感。
被問到有幸同謝茜嘉拍接吻戲，約雲話：「同靚女合作兼親熱梗係好，不過呢個係蜻蜓點水式接吻。」而連拍兩部漫畫電影嘅謝茜嘉就指《神奇４俠》同《罪惡城》好唔同，佢話：「我個角色好難宣洩情緒，佢嬲或傷心時會隱形，情人唔理佢又隱形，真係好難搞。」
「折磨咗五個月」
約雲同謝茜嘉話最愛嘅英雄都係超人，基斯就鍾意《星球大戰》嘅索羅船長，至於米高十幾歲就夢想扮演石頭人TheThing，佢唔贊成用ＣＧ特技，話要親身上陣，所以每次拍攝前佢都花三個半鐘化妝，加埋拍攝，每日平均有十二個鐘着住六十磅重嘅石頭戲服，佢苦笑話：「化妝後又熱又攰，其間冇得食嘢同去廁所，只能飲流質食物，我足足被折磨咗五個月！」
記者李恒聰悉尼專訪