吳文忻近日迷上打泰拳，日前她跟隨女教練學拳，施展凌空批踭、踢沙包等動作勁度十足。吳文忻表示出一身汗感覺極爽，又能消水腫和減壓，打拳的姿勢亦十分有型。
吳文忻日前到銅鑼灣一泰拳館，跟隨女教練Yolly練習泰拳，吳文忻穿上bratop、長褲及戴上拳套，以全副武裝上陣。她首先拳打腳踢沙包熱身，之後便開始練踢腿、揮拳攻擊及凌空批踭等動作，練習一會兒已香汗淋漓。
教練讚身手敏捷
教練Yolly大讚吳文忻身手敏捷，她說：「以一個練咗個幾月嘅學生嚟講，佢打得OK㗎嘞，可能佢學過跳舞，腳踢得好高，筋好軟，手腳靈活，但都要學技巧，腳踢得高唔代表大力，因為佢嘅姿勢未夠正確，再學吓會好啲。」
吳文忻說：「我學泰拳係因為有個女仔朋友上過堂之後話好，於是介紹我上嚟，我試過一堂就愛上呢個運動，我覺得打泰拳可以將抑壓喺心底嘅壓力宣洩出嚟，況且我本身有啲水腫問題，打拳可以消水腫，又有挑戰性，打拳好型㗎！」
吳文忻又表示打拳能減掉腰間贅肉及增強抵抗力，她說：「我試過做香薰治療減肥，都有用嘅，但始終唔同做帶氧運動，帶氧運動可以促進新陳代謝，過去兩年我都冇乜傷風感冒，證明運動好緊要，可以增強抵抗力。香港女仔慣咗瞓喺度俾人減肥，其實做運動對心肺機能會好啲，亦可以將唔開心嘅嘢發洩出嚟。」
做藝人乜都要等
吳文忻揚言做藝人壓力不少，所受的心理壓力比較大，她苦笑說：「做呢行有好多嘢都唔喺控制範圍之內，等嘅時間多過乜，等埋位、等化妝、等機會、等運到，等嘅時候有好大壓力，再加上報道，有乜嘢事就會令到家人好唔開心，呢啲事通通都構成壓力。」
採訪：朱倬誼
攝影：仇志德
場地：SWISHCLUBThaiBoxing&Fitness（CausewayBayHouse）
