地鐵又飛站要致歉，列車服務近年真係多事，但搞商場就好成功，好多時重快同行一步。即如今個禮拜五係回歸日，地鐵又舉行購物優惠日，當日喺旗下四個商場──九龍灣德福廣場、青衣城商場、柴灣杏花新城同荃灣綠楊坊，總共派發四十萬現金購物券。凡消費滿一千蚊，就送一百蚊現金購物券，可在場內八成逾四百間店舖使用。呢個係地鐵暑假連串優惠嘅第一炮，七月九號開始，四個商場同埋將軍澳連理街商場，重會舉行即抽即獎同旅遊大獎等優惠，迫消費者今個暑假大出血。
地鐵總商場事務經理陳嘉明預料，購物券優惠可為各商場帶來起碼多五巴仙嘅人流同生意。蘭西都成日行地鐵商場，發覺真係好旺，管理上有追上太古九倉之勢。
電郵地址：[email protected]