董橋社長論曾蔭權：《幸虧曾蔭權命好》（六月二十七日），令人會心微笑，文章最後一句係：「幸虧曾蔭權命好：命好是他的本錢。」
董社長唔知會唔會算命，或有獨得之秘而言之。看畢大文，醒起六月二十四號下午接近收工時分，紫微居士突然光臨左丁山寫字樓，佢話雲遊四方，是日啱啱巡到中環，路經左丁山office，覺得要歇歇腳，飲杯茶，去一去洗手間。紫微居士駕到，自不然歡迎之至，順便請佢贈幾句，大有得益也。
贈完流年風水，向佢請教：「曾特首上京宣誓就職，肯定係大貴之人，究竟佢嘅八字如何？」紫微居士立即叫左丁山秘書上網，找出曾蔭權命盤，咦，所有公開晒嘅資料包括出生年月日（曾蔭權出生於一九四四年十月七日），即甲申年癸酉月甲辰日，係人都知，但點知佢喺邊個時辰出生呀？紫微居士撚手微笑：「你就唔識啫，我哋會推算番出嚟嘅，嗱，佢係戊辰時（上午七至九時）出世嘅，咁就可以搵到命盤啦。」
既有如此資料或「假設」，當然易辦。淨係睇八字，五行欠火，透癸水，命書話：「主科甲不全」，唔怪得曾蔭權讀完香港華仁就唔入港大。紫微居士大喝一聲：「你識得乜吖，睇吓命盤，曾特首之福德宮天機坐鎮，靚到無得彈，要乜有乜，三台八座，天宮紅鸞，對照身宮有天梁，恩光天才，天喜月德，簡直係靚到好到乞人憎嗰種，一言以蔽之，蔡素玉講得啱，曾蔭權好命兼有運，邊個條氣唔順，可以移民鬆人！」
紫微居士既然咁講，冇法子唔信，惟有拜服。至於曾特首上任之後，有冇阻滯？紫微居士話暫時天機不可洩漏，費事講，重話左丁山知道都無謂！與佢傾偈之後隔三日，就見到董社長話曾蔭權命好，特此為記。