機場管理局噚日公布咗一張好靚嘅成績表，舊年四月到今年三月底，全年賺十四億一，破晒紀錄，重向大股東──香港政府派息十億大元，令庫房多一筆可觀收入。照計，機管局上上下下嘅同事都應該有份加人工或者分多少花紅啦。
但根據機管局最新年報顯示，機管局行政總裁彭定中舊年竟然被減薪。雖然基本年薪無變，都係四百七十萬，但花紅就分少咗四十萬，只有一百五十萬，夾夾埋埋，全年薪金係六百八十萬，比前年少咗百分之四。其他執行總監嘅人工基本上無變。
八方噚日都尷尷尬尬咁走去問彭總點解俾人減薪，佢就笑笑口叫八方問吓董事局。姑勿論點，彭總做出嚟嘅成績有目共睹，花紅分少啲都冇所謂啦。
傳真︰2623-9278
電郵︰[email protected]