房屋協會前主席鍾瑞明，舊年五月俾上海地產富豪許榮茂「私有化」，過檔去佢間上市公司世茂中國（現名世茂國際）做行政總裁，本來任期三年，即係做到○七年五月三日，點知做咗一年左右就「劈炮」。
噚日世茂國際公布，鍾瑞明以私人理由辭任執行董事兼行政總裁，由於要三個月通知，辭職生效日期碰正係十月一日。
前排推出極品豪宅施勳道一號嘅世茂，今年都算新聞多多，許榮茂公告天下，要喺中俄邊境起貿易區，個貿易區喺俄國嗰邊重有個賭場，然後佢又想將成個項目注入上市公司，跟手將大陸嘅地產項目拆出嚟上市，雖然注入貿易區單嘢已經得到股東批准，但大陸地產項目幾時上得市重要等交易所批准，鍾生𠵱家走唔知係搵到新挑戰，定係另有原因？