梁靖琪（Toby）最近推出個人唱片，早前更遠赴新加坡拍寫真，破例地性感，不過拍攝現場很多蚊，穿上三點式的Toby成為蚊子的大餐。
四人女子組合女生宿舍的成員梁靖琪，被唱片公司MusicNation看中，安排她錄製個人大碟，更已於上周推出。唱片公司對Toby的大碟十分重視，落足本做宣傳，早前更拉隊到新加坡的民丹島為Toby拍攝寫真集，Toby穿三點式泳衣，罕有地性感。
父母齊支持
Toby為了處女大碟，緊張得經常失眠，在出碟前一晚，Toby心情非常忐忑，她說：「因為第一次出碟，唔知反應係點，當然會緊張啦。不過我好多謝爹哋同媽咪（無綫高層梁家樹、古天樂經理人蕭笑鳴），因為出碟第一日，佢哋就第一時間買咗我隻碟嚟支持我，好彩出邊嘅反應都唔錯，我先可以放下心頭大石。呢排都係忙唱片宣傳，遲吓可能會拍電影，最近有幾部戲傾緊。」
拍劇有嘢學
自從拍完爾冬陞執導的《千杯不醉》之後，Toby對演戲愈來愈感興趣，她說：「第一次同爾冬陞合作，我已經覺得學到嘢，因為導演好有耐性教新人做戲，佢知我嘅中文唔好，叫我慢慢嚟。如果將來有機會，我希望可以拍到唔同導演嘅戲，磨練吓演技，如果時間配合到，有好劇本，我亦都想拍吓劇，因為對我呢啲演戲初哥，拍劇當然可以爭取到學嘢機會啦。」
採訪：陳月媚
