美國今明兩日議息，市場預期加多0.25%之後息口將橫行，即係話息魔暫時會休息一陣，股市樓市將有運行。
下周G8開會，市場再炒人民幣升值，資金有流入港股的迹象，特別是國企股，好友尾市大力推高，恒指升111點，收報14287，成交達183.73億元，擺明為今日期指結算造勢。恒指對上一次高位是去年12月的14339，以近期走勢看，大市點都會試吓呢個位，甚至有機會突破。
好友先前主要靠中移動（941）推高大市，但噚日就玩隻大落後嘅石油股中海油（883），全日升7%至4.60元，推高恒指升近40點，成交金額達16億元。市傳中海油正部署踢高配股，現時管理層全力游說美國批准收購Unocal，而收購Unocal的短期融資（大部份可轉作長期融資）已經搞掂，照計中海油未使配股住。
和記港陸暫難私有化
三大石油股中，中石油（857）由6月至今累升17.6%，中海油只升7%，而中石化（386）則升7.89%。三大石油股中，以中海油最受惠油價上升，不過早前市場擔心中海油會以超高價收購Unocal才令投資者卻步，相信該股仍有排追落後。
和記港陸（715）早前大幅急升，其後傳出可能私有化。一般而言，大股東若覺得公司資產（通常係需要估值的固定資產而非流動資產）豐厚，但市價偏低，才會提出私有化。
不過和記港陸早前話過手持現金20億元及流動資產，相當於市值63.7億元的32%。除非公司首先向股東盡派現金，否則私有化計劃都幾難獲得小股東同意。如果現金公司都可以折讓價進行私有化，相信國浩（053）一早就搞私有化。
阿虎