爵士出席立法會答問，顯示強人本色，面對長毛，笑笑口冇乜反應，之不過民建聯副主席劉江華挑釁，猛咁揪住「政治家」唔放，就面帶怒容，話唔想再糾纏呢樣嘢，唔知佢想問乜！
跟住，對於競選時「承諾」過會「研究」嘅，爵士透露咗一啲「研究」結果。「政務助理」呢樣嘢，基本上就係NO！八方都話咗「政務助理」呢條屎橋，不但行唔通，而且會挑撥分化公務員，搞到社會大亂，提出嘅嗰個，其心可誅！
爵士話，「政務助理」就冇嘞，「練習生」就有喎！「練習生」想十萬銀一個月人工？笑話。既然走入嚟「練習」，人工最多三千銀一個月就夠，而且因為係嚟學嘢，分分鐘唔應該有工資，而係由練習生交番學費畀政府！
政府請「練習生」，做咩好呢？有呀，不如由「揸掃把」清潔工作做起咧！爵士身為政務司司長嗰陣，都做過一輪清潔大隊練習生，老左出身，個個熱愛勞動，一定冇問題，不過會唔會好似當奴咁能屈能伸，練習咗冇幾耐，支掃把突然曉飛，就做埋特首，睇怕冇咁好命！
保送精英學沖茶洗廁所
邊個若果有興趣，唔啱又保送幾個精英入嚟做吓練習生，同AO沖吓茶（唔好靜靜雞加料喎），又或者喺港督府洗吓廁所呀咁，學習「政治經驗」！
爵士咁識走位，唔怪得民建聯嘅鄺志堅大罵佢「陰毒」！陰毒？好笑喎，陰毒得過想開設「黨委書記」監視晒個政府？
至於其他嘅「承諾」，例如最低工資呀咁，原來經查明，係嫻姐工聯會等要為咗聽命中央主人，焗住提名爵士，自己口噏噏咁話係煲呔「應承」咗，查實係面子問題，自己同自己搵台階！
梗係咧，乜都「承諾」，繼老董之後，咁煲呔咪變咗第二棵人肉許願樹？年初四，連林村許願樹都冧埋，一早個天就報警畀爵士，叫佢千祈唔好應承啲老左咁多嘢！兩年過渡去五年，平平穩穩，冇動作，冇承諾，嗰啲以為自己揸住張支票，想兌現嘅懵仔懵婆，好醒吓嘞！
競選時期，「承諾」過乜？冇喎！好似飲大咗兩杯嗰陣時，夠話過醒番之後娶你做老婆咯！
爆料熱線：29290000、27860099
報料傳真：26239278
報料電郵：[email protected]