長實集團班夥計日日在港搞記者會催谷名門（唔係講笑，真係日日），老闆就飛咗上汕頭，因為汕頭大學有個「與大師同行」講座，請咗誠哥去講「管理的藝術」。有咁猛料講者，所以昨日講堂坐滿三百幾人，除咗MBA學生，重有其他人捧場。
咁李嘉誠講咩呢？佢話一個好管理人除咗要識管人，重要識管自己，更重要係識用槓桿原理去省資源提高效率。誠哥重爆料話經常記起佢阿嫲感歎：「阿誠，我們甚麼時候能像潮州城中某某人那麼富有」，唔怪得佢咁努力賺錢。至於佢自己就時時教個仔要建立「沒有傲心但有傲骨的團隊」。
誠哥今日重會出席汕大畢業典禮，聽講會同畢業生講吓點培養毅力同心力。