遊行，除咗可以表達遊行者嘅訴求之外，原來重有無限商機。去年七一遊行有幾十萬人參加，遊行沿線嘅舖頭就各出奇謀：有賣餅賣飲品賣到出街，生意激增5成嘅西餅店；亦有VCD舖狂銷過百隻《7.1》VCD。夾啱天時、搵啱地利，除咗聖誕、新年，似乎「七一」一樣會成為一個𢱑銀佳期！
記者：馬慶武 攝影：陳盛臣
Models：Yammie、Ken（Salvador）
今年嗌咩口號？
上年人人矛頭直指董先生，今年嗌咩口號呢？打頭陣嘅民間人權陣線就表明今年口號係「爭取全面普選，反對官商勾結。」他們更會派發一萬支代表包容嘅彩虹旗以及「關注性傾向歧視立法」單張。今年遊行由基層婦女團體及同性戀團體等弱勢社群領頭，咁大眾嘅矛頭又指向邊個？支持定柴台？即睇街訪！
同志社區聯席係帶頭組織，發言人煒煒話除咗帶頭隊伍會攞番民陣Banner，小隊重會有一啲較特別嘅同志口號：
「同志不同志，都係香港一分子。」
「同志現身，支持雙普選。」
「不再隱形，不再被定型。」
舊年：生意激增5成
今年：新推方便走路餅
今年遊行嘅路線同上年一樣，人潮勁大塞車，起碼要行兩三粒鐘，最多人幫襯嘅一定係飲飲食食。由於鐵馬分隔遊行路線，所以上年怡和街嘅小食店、便利店出晒街賣飲品，「東海堂」更攞埋麵包西餅上街賣，生意額比一般公眾假期好5成。今年「東海堂」繼續幫遊行隊伍補充體力，推出一系列方便邊行邊食嘅西餅麵包，人潮一出發，麵包即出爐！
今年推介
合桃肉鬆芥辣卷（$5）
營養豐富又唔會食得論盡，大大件，當係午餐補充體力一樣掂。
蛋糕棒（$6.5/條）
有朱古力、青提子及黑加侖子三種口味，獨立包裝重係棒形，啱晒邊行邊食。
鮮榨果汁（$13/支）
有橙汁、西瓜汁和奇異果汁，而且會有榨定嘅現貨，即叫即有唔使等，唔會阻慢遊行進度。
東海堂（28817212）
銅鑼灣怡和街22號地下1號店
舊年：一日狂銷過百《7.1》VCD
今年：Plasma熱播看門口
遊行表訴求，咁有意義絕對值得紀念，上年遊行期間銅鑼灣有VCD舖用Plasma播放前年七一遊行嘅壯觀情形，重有《7.1》VCD賣，好多遊行人士都即時幫襯紀錄歷史。該舖亦即時破晒賣碟紀錄，一日賣出過百隻！咁又係，今年去遊行，買番隻VCD第時播畀仔女睇，加番句「老竇媽咪當年都係熱血青年嚟㗎！」，係威喎！
匯點
銅鑼灣駱克道535號地下
狂賺食點應變招
魚蛋檔送發泡膠兜
QQ便利店老闆娘文小姐話前年七一生意好好多，舊年就唔算特別勁，不過都有好多人買定幾串小食隨時拎出嚟食。
QQ便利店
天后電器道22號地舖
起步前食發達牛腩
喺遊行起步點附近嘅「華姐清湯腩」，開業一年多，主理人華姐出身於店旁嘅「大利清湯腩」，煮嘅牛腩好食到食家唯靈都喺專欄大讚特讚，而且大把熟客幫襯。不過平時公眾假期都係食飯時間會爆滿，但遇啱七一就由朝早到下午3點都Keep住爆滿，大把遊行人士起步前嚟食飽飽，生意額升一倍，最好賣就係招牌牛腩麵。
華姐清湯腩
地址：天后電器道13號地下A1號舖
今年In&Out
上年烈日當空，今年有可能落雨；上年幾十萬人，今年估計10萬唔夠；加上「當紅」官員唔同晒兼大家冇病冇痛，睇嚟全身裝備都要Update。唔想買錯裝備表錯態，即Check！
Download七一E-card
民間人權陣線網址今年有七一遊行海報及E-cardDownload，製作精美，快啲Send畀老友提吓佢7月1日參加遊行啦。
IN
OUT
