大市有氣勢，恒指收14287，距去年12月高位14339只相差52點，用7月期指14320比較，則相差更少。恒指升111點，有39點由中海油（883）所貢獻。中海油C輪升到開巷，高價追貨要諗埋風險嗰便。
港股有得睇，滙控（005）與中移動（941）兩大火車頭，唔會冇份上升。
滙控C輪3807：滙控升1元，收127元，距52周高位136元好多，有水位，吼C輪炒。
滙控C輪3807收39.5仙，升1.5仙。隻輪對沖值61%，如果跟足正股，是日應升6.1仙，未有出現理論升幅，即係抵買。隻輪9月中到期，溢價得0.7%，槓桿率32.2倍（有效22.4倍），引伸波幅9.8%，數據靚極。重有兩個月壽命，相等於每個月溢價只係0.28%，幾乎平水。
中移動C輪4942：中移動最低見28.85元，彈番上29.40元高收，升0.25元，繼續睇好，搵C輪炒，可揀4942，11月下旬到期，輪價26仙，溢價3.4%，槓桿率11.3倍（有效7.9倍），引伸波幅21.5%。亦可諗隻4998，呢隻壽命長少少，交投更活躍，昨收24.3仙，升1仙，升得未夠。
章盛