樓市冇咁旺，買家唔使擔心海鮮價，自然慢慢揀。部份有實力業主索性封盤，但嗰啲攞長成交期諗住短炒嘅炒家，就唔係咁講，為咗唔想上身，迫住要減價去貨。 利嘉閣周德龍話，一個炒家二月底用一百二十萬買入沙田第一城四十八座中層F，八月底至要完成交易。點知等等吓，銀行一再加息，市場氣氛立即轉靜，為免夜長夢多，決定壯士斷臂。結果以一百一十六萬摸出，蝕四萬，執番身彩。