墨西哥球會瓜達拉哈拉係今年其中一支受洲際盃調兵之累嘅南美自由盃球隊，球會老細華加拿認真「體貼」，為使班球員趕及踢聽晚主場對帕拉尼恩斯嘅四強次回合復仇戰，就決定貢獻自己架私人飛機接佢哋返嚟。
瓜達拉哈拉上回合作客輸○比三，今次返主場點都唔認輸，但「華先生」咁做真係當球員係鐵人，乜佢哋唔使時間休息咩？計吓佢哋歐洲時間禮拜三晚踢完就即刻上機，墨西哥時間禮拜四朝早到埗，雖仍有大約十二個鐘空檔，但都唔夠時間唞啩。再講，國際足協好似規定球員唔可以四十八小時內踢兩場波，佢哋唔敢違例啩？
重有係呢五個「分身人」踢季軍戰會唔會無心戀戰？或者索性唔出場？墨軍後防已經冇咗停賽嘅馬基斯；𠵱家球會同國家隊嘅正選龍門奧斯華度山齊士同中場雷蒙摩拉利斯更可能冇心機踢，後防真係危危乎。