如果唔係今晚快活谷有賽馬補賽，上星期日嘅第七十八次賽事就已經係○四?○五年度馬季最後一場賽事，故此當日馬會廂房，擠滿觀眾，好多平時唔出現嘅會員，呢日都到馬場玩吓。最弊就係好多人真係嚟玩吓，投注興趣唔大，得個嘈字，正宗長期馬迷就覺得太滋擾咯。譬如馬主Ｈ聽到有人喺度猜枚，嘻哈大笑，馬主Ｈ話：「唔該佢哋去吉澳吧飲酒啦！」
當日有馬主協會錦標，「馬中之王」爆大冷奪得冠軍，頒獎之時，只見馬會主席夏佳理身穿黑色西裝。咦，少見噃，夏主席平時最鍾意穿着淺灰色、泥黃色西裝，佢喺馬場穿深色西裝，好多會員都未見過。為何如此？有人傳出消息，話夏主席丁母憂，喺星期六晚嘅馬王頒獎禮已經冇出席，星期日係馬季最後一場日馬賽事，點都要到場嘅。夏主席侍母至孝，佢窮等人家，少數族裔，由阿媽苦心撫養成材，阿媽去世，唔傷心就假。不過夏媽媽年紀已經九十過外，兒孫滿堂，可說福壽全歸，算係笑喪，夏主席請節哀順變。
另一位董事許仕仁亦有出現，可能係最後一次，之後就去做政務司司長，唔辭去董事職位唔得。邊個會代替許仕仁做董事呢？可能會有競選情況出現，冇人有必勝把握，報紙話滙豐亞太區主席鄭海泉會出選，似唔似呀？艾爾敦重坐響度噃！現在香港一啲古老傳統，已冇人遵守，譬如以前滙豐啲蘇格蘭人做到退休，一定返鄉下，但自從施德蘭留居香港後，艾爾敦亦以香港為家。留低喺香港，亦唔辭去馬會董事職位。按理以往歷任滙豐大班都係馬會董事，自從滙豐將總部搬去倫敦，集團主席（即大大班）住在英國之後，就由亞太區主席做馬會董事，𠵱家應該輪到鄭海泉做，但艾爾敦唔走喎？以後滙豐咪要向佢借房先至可以有董事廂房招待人客？一百年來滙豐未有之事也。