亞視舉辦嘅「2005亞洲先生競選」舉行在即，噚日又有韓國同印度嘅代表報到，大會安排佢哋喺中環一間健身中心同傳媒見面，大玩kickboxing。
點知大會準備嘅運動褲勁短，搞到唔少參賽者喺踢腿時露底，不過佢哋都唔介意，依然玩得好投入，其中兩位嚟自內地嘅參賽者張政湧同趙涌，因為學過兩年少林功夫，所以打起kickboxing上嚟零舍有功架。
應邀來港參賽
至於印度代表ElvisParkinson就話佢喺印度專幫一本國際時裝雜誌做模特兒，呢次係大會邀請佢嚟香港參加比賽嘅，佢用英語話：「喺印度如果想入行做演員，一般都係由做模特兒開始。」而賣相有啲似韓國男星權相佑嘅韓國代表尹彰培，就話自己嘅偶像係金城武，所以佢服兵役時啲同僚都叫佢做金城武，佢透過繙譯話：「我會做番多啲運動，希望操大隻啲。」
