鄭中基去年初訂購一輛價值一百三十八萬元的平治旅行車，收車時發覺出廠年份不符合要求而拒絕收貨，但汽車經紀卻未有退回二十萬元定金。鄭中基表示，再等多一個月仍未收回定金，便會採取法律行動。
據本報收到消息，鄭中基去年初透過一名黃姓經紀訂購一架價值一百三十八萬元的水貨平治E55AMG旅行車，原本於上年七月收車，後來鄭中基答應經紀，等○五年新款車到，但鄭中基今年四月收車時，發現出車紙上的出廠年份是○四年，他覺得貨不對辦而拒絕收貨，但二十萬元定金一直未能取回。
去年年初落定
鄭中基昨日接受本報電話訪問，他說：「個經紀姓黃，我上年年頭同佢訂車，合約上面寫明七月十五日前收車，否則退番錢畀我，但一直到成九月都未有車，佢話有○五年新款問我等唔等，我諗住爭幾個月都○五年，咪等埋囉。點知兩個月前佢叫我去收車，但出車紙上面寫住○四年車，佢話可能係打錯咗喎，咁都講得出，你話我重應唔應該信佢呀？爭一年車爭好遠㗎喎，賣番出去都唔同價啦，驗車又要早一年驗。」鄭中基決定不收貨，但經紀一直不願退定，之後多番未能聯絡對方。
經紀：我蝕本㗎
記者聯絡上黃姓經紀，他在電話中說：「架車到咗係○五年新款，只係出車年份係○四年十二月，佢要綠色車紅色內櫳，特登造㗎。我同車行講咗，賣得出咪還番啲定畀佢囉。」問到知否為何鄭中基不收貨，黃經紀說：「我點知佢點解唔要呀，我好心叫佢等新款，送多好多嘢畀佢，蝕本賣畀佢㗎。」
後來鄭中基得悉經紀表示要將該車賣出才會退定時勞氣地說：「佢架車賣唔賣得出唔係我責任，佢一世賣唔出我咪一世收唔番錢？總之佢收咗我定又唔能夠履行合約，要佢退定好合理，最多等多一個月，如果佢都唔畀番錢，我就採取法律行動。」
採訪：蔡如玉 攝影：李珮洳