今次喺太古城「中國恐龍化石展覽」展出的八條龍，隻隻都係食草大嘅，唔同嗰啲下下要食肉至飽嘅食肉獸。不過食齋食葷，大家都死咗過億年咁話。難得今次齊齊超時空開P，吸引逾10萬市民擺龍觀賞，到底點先可以睇得輕鬆？有計！
記者：邵超
攝影：伍慶泉
Model：Vanessa（Salvador）
投票揀最愛
避人龍攻略
今次的恐龍展共有8具來自北京自然博物館和四川自貢恐龍博物館的恐龍化石，以及10件屬恐龍時代的動植物化石標本，涵蓋三叠紀、侏羅紀及白堊紀（即距今2.25至0.65億年），其中兩條更是首次在大陸以外的地方展出。根據太古商場的實Q哥哥畀料，喺星期六、日早上十一點幾已經出現排隊人龍，如果星期一至五嚟參觀就無咁恐怖。
1.睇準閒日八時後
每朝商場開門至十二點前都好少人。星期一至五晚上八時後，星期六、日下午六時人龍會漸漸散去，正係出擊好時機。
2.地鐵D出口搵龍尾
高峯期地鐵站會實施人流管制，疏導太古城E出口的人群，改用D出口。走出D出口再步出商場外見ESPRIT即搵龍尾，有機會排到去華蘭路。千祈唔好走上二樓，唔係就要戇居居落番嚟。
3.先攻二樓攞號外
建議先排二樓中橋的隊，因為可取得刊有恐龍資料的號外乙份，填表參加展覽期間舉行的「恐龍雙重獎上賞」，投你最喜愛的恐龍一票，並參加大抽獎。
4.二樓分開兩條龍
一樓有三副恐龍骨唔使排隊；二樓要排兩條隊：中橋是最大型展場，龍尾約在ESPRIT至華蘭路一段；另一條隊是摸天府峨眉龍股骨，龍頭在顧客服務中心前，龍尾在麥當勞附近。高峯期二樓中橋約排30至45分鐘，摸骨約排20至30分鐘。
展覽資料
日期：即日起至7月31日
地點：一樓（近溜冰場）、二樓舞台及中橋
備註：於展覽期間，逢星期六、日舉行專家研習會，講者是四川自貢恐龍博物館的恐龍考古專家。
忽然發達：三樓恐龍玩具被搶清
今次商場唔想騷擾商戶，所以要先在街上排隊再逐批放人入商場，個別商戶都有受到影響，乾脆關上玻璃門。最受惠當然是二樓麥當勞，個個行到攰或者想遲少少排隊，都會坐低幫襯。另外三樓攤檔OwlNest（展期至7月6日）和玩具反斗城，Fans狂掃恐龍精品唔手軟，營業額激升，部份貨品更已售罄。
店舖資料
（a）OwlNest 太古城中心三樓（近玩具反斗城）www.owlnest.hk
（b）玩具反斗城 31946399
龍氣榜
（川）四川自貢恐龍博物館
（京）北京自然博物館
第一位：我係巨無霸
天府峨眉龍（川）
亞洲第二大龍，最長的頸椎約為背椎的3.5倍，是龍中巨無霸，性情較溫和。此龍更是首次在大陸境外展出。
第二位：最長頸「薛小姐」
井研馬門溪龍（京）
至今仍保持最長及最完整的恐龍化石，其頭骨細小，論頸長暫時是恐龍之最，身體笨重，估計體重達60多噸。
第三位：我最細，但我型仔
中國鸚鵡嘴龍（京）
全場唯一迷你恐龍化石，須特別放入玻璃飾櫃。身高不足一米，用兩腳走路，因上顎骨似鸚鵡嘴得名。
第四位：邊個夠我貴！
李氏蜀龍（川）
化石之完整度最高，保險金額亦最高。特徵是頸較短，後肢比前肢長，腳骨數量相若，長而細的牙齒咬力驚人。
