擁有Fcup驕人身材嘅日本性感女星酒井若菜，自從良轉型為女演員之後，已經好少拍水着寫真。不過，若菜早前被偷拍同搞笑男星木尾原雄太親密睇棒球賽後，流失咗唔少男fans，最近佢又患上急性腸胃炎而辭演舞台劇，真係黑仔。工作量買少見少嘅若菜驚死人氣繼續下跌，於是急急忙喺今個星期五推出寫真集《μ》，實行重操故業，而部份寫真已率先喺新一期日本漫畫雜誌《BIGCOMICSPIRITS》度刊登。
高貴性感兼備
若菜今次特登遠赴紐約取景，重着埋性感比堅尼同內衣上陣，甚有睇頭。其中若菜喺酒店房間內着住喱士內衣扮換衫，性感得嚟亦流露出可愛嘅味道。拍攝期間，若菜又貪得意將拍攝用嘅鴨仔放喺頭頂，認真鬼馬。
除咗性感look之外，快將二十五歲嘅若菜亦喺寫真入面展露高貴成熟嘅一面，佢戴住黑色假髮，披上白色露肩婚紗，坐喺酒店天台上俯瞰紐約景色，真係靚人靚景冇得彈。