一講許仕仁，大家都稱佢為「橋王」，至於佢鄉下喺邊，屋企做乜，就好少人有講起，最多就話佢係皇仁仔，讀書好叻，喺港大讀英國文學。既然許老爺好快就榮升政務司司長，都值得起吓佢個底。
血統--四分一唔係中國人
唔講唔知，原來祖籍廣東東莞嘅許仕仁唔係純種中國人，佢阿爺當年係清朝大官，被派去印度做外交工作，話說佢回國嘅時候經過某個群島，遇到一個令佢極為傾心嘅女子，於是娶咗佢做老婆，重帶埋返中國。
至於許仕仁阿爸許聲泉，就畢業於上海交通大學，即係江澤民嘅校友。許仕仁阿爸因為香港淪陷同家人去咗澳門，認識咗名門崔家小姐瑞愛，結成夫婦，於是就生咗許仕仁。𠵱家兩位老人家都先後離世。
所以講血統，老許有四分之一唔係中國人，至於佢老竇有冇同煲呔老竇曾雲一齊共事做國民黨特務對付日本人，真係要問金勞詹先至知。老許阿爸喺香港重光後返落嚟，落籍離島大澳，所以許仕仁同劉皇發佢哋講笑，話佢係香港原居民，有資格攞丁屋㖭。
家世--母親外家澳門顯赫
講開老許媽媽嘅外家崔氏家族，又的確好威。有報道話佢外公崔諾枝係澳門商會總協理，連澳門嘅慈善組織同善堂都有個佢嘅紀念銅像；至於老許舅父崔樂其，就係澳門誠興銀行創辦人，同澳門中總副主席崔德祺、全國政協副主席馬萬祺並稱「澳門三旗」。
崔樂其嘅葡文了得，重做過何厚鏵爸爸嘅葡文秘書，所以何厚鏵好早就識得許仕仁，因為何家同崔家關係密切。
話時話，煲呔老婆曾太屋企喺澳門做餅家，而老許阿媽屋企就係澳門望族，真係有澳門概念，抵佢哋掂，亦唔怪得老許得到北京信任。八方聽聞董建華後嚟從鏵哥口中知老許都有啲背景，就另眼相看，重叫佢重返政府做財政司司長，不過，老許咁精，梗係唔制啦。
富貴--十六萬租住禮頓山
老許○三年離開積金局去同郭家打工搵真銀，今次因煲呔而再度出山，講明只做兩年，啲民主派人士話佢同商界千絲萬縷，睇怕佢都會直認不諱，八方聽講佢五月辭九巴董事時，亦辭埋新地份政治顧問嘅工作，今個禮拜佢重會辭埋馬會董事㖭。
當然從今之後，佢有排唔可以好似以前咁逍遙，可以隨街擦鞋，或者同老婆羅美美四圍去聽歌劇喇。
許仕仁話咗唔會住白加道官邸，只會喺嗰度請客，至於佢𠵱家就租緊新地禮頓山中層雙連單位住，按市價每月交十六萬租，認真豪氣。
傳真︰2623-9278
電郵︰[email protected]
