溫家寶總理飽讀詩書，演講之時、閒談之際，隨時可以丟書包，令到聽者、記者、繙譯頭都痛晒。佢接見曾特首，贈一句話：「士不可以不弘毅，任重而道遠。」一位香港政治分析師（自外國回流）睇完電視，打電話問左丁山：「任重而道遠我就識，唔明白士不可以不弘毅喎？」左丁山教佢上網搵confucius.org網站，搵LunYu（論語），內有十幾種語言版本，包括英語在內，應該一睇就明。如果唔明，請打電話畀香港大學法律學院陳弘毅教授，問陳教授解釋點解佢老父會為佢取名「弘毅」！
溫總理引《論語》，句句唔搵，專登搵一句曾特首祖宗曾參（曾子）嘅說話，真係含有深意。曾蔭權曾去山東拜祭曾子，有人話佢係曾子第七十幾代孫，溫總理就以《論語．泰伯第八》第七句：「曾子曰：士不可以不弘毅，任重而道遠。仁以為己任，不亦重乎？死而後已，不亦遠乎？」送給曾特首，好多本港分析家認為「任重而道遠」，耐人尋味，究竟國家交付畀曾特首乜嘢任務?職責呀？到死方休噃，幾辛苦呢！
《朱熹集注》說：「弘，寬廣也；毅，強忍也，非弘不能勝其重，非毅無以致其遠。」據論語專家楊樹達之姪楊伯竣譯註嘅《論語譯註》（左丁山手頭版本乃一九八○年北京中華書局繁體版）就係咁講（第八十、八十一頁）：「曾子說，讀書人不可以不剛強（弘）而有毅力，因為他負擔沉重，路程遙遠。以實現仁德於天下為己任，不也沉重嗎？到死方休，不也遙遠嗎？」這裏「弘」作「剛強」解，楊伯竣引章太炎《廣論語駢枝》：「《說文》，弘，弓聲也，後人借『強』為之，用為『彊』義，此『弘』字即今之『強』字也。」
所有曾氏嘅祖宗曾子話仁以為己任噃，請曾特首注意：你嘅責任係行「仁政」，唔好會錯意，以為國家要你強行推動二十三條呀！