雖然上周五美股唔妥，港股市底好，恒指最差之時都只係冇咗88點，埋單跌幅收窄到54點。喺低位買貨應該係啱嘅炒C輪策略，咪諗住吼高位買P輪。
昨日話過，喺低位買國壽C輪3794，隻輪早段跌到28.5仙（上周五31仙），如果揑得準上車，到收市見34.5仙，已經執21%利錢。
長實C輪4740：長實（001）挾高價賣名門氣勢，高收76.50元，升75仙。C輪10兌1，如果跟足正股，應該升7.5仙，當然冇可能跟足，因為有個「對沖值」因素要計算。例如對沖值係70%（C輪3935就係呢個對沖值），輪價就理論上應該升5.3仙。3935升4.5仙，升幅同理論上升幅差不多。
長實C輪4740升得2仙，收39仙，未升得夠，未跟貼正股，其實係因為臨尾掃上40仙，電腦則判收39仙。隻輪10月尾夠鐘，溢價3.1%，槓桿率19.6倍（有效12.4倍），引伸波幅15.9%。長實C輪，4740博得過。
和黃C輪4717：和黃（013）收70.50元，移低1格，熱門C輪4717收30.5仙，跌5%。長實好，和黃都會跟住好，和黃C輪要買，4717數據靚，10月尾夠鐘，溢價3.6%，槓桿率23.1倍（有效13.1倍），引伸波幅16.1%。
章盛