聽日截標嘅淺水灣道一一五號，雖則有發展商話限制多多冇興趣，但蘭西估計，至少有幾個潛在買家，包括科達主席湯君明，原來佢揸住隔籬淺水灣道一一三號三分一業權，隨時增持一一五號博升值。
佢喺附近有幢豪宅收緊租，噚日聽佢講開，好清楚一一五號地契，佢睇呎價約九千，共值三億。
淺水灣道一一三號有十八伙，湯君明大約揸住六伙，佢話，知道後面保華大廈業主，聯手收購一一三號個別單位。咁幢大廈唔易重建。
照睇，今次保華大廈好可能有業主聯手，或者拍住有實力發展商，競投一一五號，一則可保住淺水灣靚景，二則日後保華大廈重建，就有多啲樓面，價值高啲。
蘭西知道，重建淺水灣道一一七號嘅泛海，都計緊數。
電郵地址：[email protected]