有「上海姑爺」之稱嘅瑞安集團主席羅康瑞，今個星期六開咪做港台節目《一切從心開始》，訪問立法會主席范太。佢自爆個人成長過程並唔和諧，呢個同佢父親大人羅鷹石嘅管教方法有關，事關羅世伯自細就培養子女嘅「競爭」精神，結果令到佢哋幾兄弟姊妹關係疏離。以致初踏足社會，仍然好擔心自己嘅表現，搞到胃潰瘍。
事實上羅世伯教仔真係好嚴，到今日羅康瑞都未曾同老竇講過一句笑話。而當年出國讀書，佢老竇從來唔畀零用錢，迫佢自己打工搵食，當時上海姑爺都有啲嬲老竇㗎，但𠵱家諗番，反而好敬重老竇，因為明白到佢犧牲父子關係其實係要栽培佢成材。至於范太，亦大話佢老竇管教都好嚴，成績唔好就俾老竇痛罵，又連着短褲打波都唔得。
咁係咪引證到「嚴父出叻仔叻女」？羅康瑞同范太可算係最佳人辦。
傳真︰2623-9278
電郵︰[email protected]